Text: Mani Matter (1936-1972)
Ig ha nes Zündhölzli aazündt
Ig han es Zündhölzli aazündt
Und es het e Flamme gäh
Und i ha für d’Zigarette
Welle Füür vom Hözli näh
Aber ds Hölzli isch dervo
Gschpickt und ufe Teppich cho
Und es hätt no fasch es Loch i Teppich gäh dervo.
Ja me weis was cha passiere
We me nid ufpasst mit Füür
Und für d’Gluet ar Zigarette
Isch e Teppich doch de z’tüür
Und vom Teppich hätt - o Gruus
Chönne ds Füür i ds ganze Hus
Und wär weis, was da nid alles no wär worde drus.
S’hätt e Brand gäh im Quartier
Und s’hätti d’Füürwehr müesse cho
Hätti ghornet i de Schtrasse
Und dr Schluuch vom Wage gno
Und si Hätte Wasser gschprützt
Und das hätt de glych nüt gnützt
Und die ganzi Schtadt hätt brönnt, es hätt se nüt meh gschützt.
Und d’Lüt wäre umegschprunge
I der Angscht um Hab und Guet
Hätte gmeint s’heig eine Füür gleit
Hätte ds Schturmgwehr gno i dr Wuet
Alls hätt brüelet: Wär isch tschuld?
Ds ganze Land i eim Tumult
Dass me gschosse hätt uf d’Bundesrät am Rednerpult.
D’UNO hätt interveniert
Und d’UNO-Gägner sofort o
Für ir Schwyz dr Fride z’rette
Wäre beid mit Panzer cho
s’hätt sech usdehnt nadinah
Uf Europa, Afrika
s’hätt e Wältchrieg gäh und d’Mönschheit wär jitz nümme da.
I han es Zündhölzli azündt
Und das het e Flamme gäh
Und i ha für d’Zigarette
Welle Füür vom Hölzli näh
Aber z’Hölzli isch dervo
Gschpickt und ufe Teppich cho -
Gottseidank dass i’s vom Teppich wider furt ha gno!
iapetus.se